दयाहाङ र प्रियंकालाई हेर्न अभिभावक चाहिने

नायक दयाहाङ राई र नायिका प्रियंका कार्कीको मुख्य भूमिका रहेको चलचित्र ‘लाल्टिन’ ले सेन्सर बोर्डबाट पीजी सर्टिफिकेट प्राप्त गरेको छ । मंगलबार सेन्सर बोर्डका सदस्यहरुले चलचित्र हेरेपछि पीजी सर्टिफिकेट दिएका हुन । थ्रीलर एक्सन ड्रामा चलचित्र ‘लाल्टिन’ २ घन्टा १३ मिनेटमा लामो बनेको छ। अब यो चलचित्र बालबालिकाहरुले आफ्नो अभिभावकको साथमा मात्र हेर्न पाउनेछन् । चलचित्र लाल्टिन सेन्सस पास भएपछि अब निर्माणपक्षले चलचित्रको प्रचारलाई आक्रामक बनाएर लैजाने तयारी थालेको छ ।
चैत १८ गतेबाट देशव्यापी प्रदर्शनमा आउन लागेको यो चलचित्रलाई देव कुमार श्रेष्ठले निर्देशन गरेका हुन् । भानु प्रताप प्रस्तुतकर्ता रहेको यो चलचित्रलाई अनिम श्रेष्ठ र राज केसीले निर्माण गरेका हुन् । मनोज राजभण्डारी र दीपक श्रेष्ठ यसका सह-निर्माता हुन् । चलचित्रमा हरि लामाको छायांकन, अर्जुन जीसी र वनिश शाहको सम्पादन, भानु प्रताप र किरण माइकलको लेखन छ । रोशन श्रेष्ठको एक्सन रहेको चलचित्रमा कविराज गहतराज, दिकेश र भानुप्रतापले कोरियोग्राफी गरेका छन् ।
चलचित्रमा दयाहाङ राई, प्रियंका कार्की, केकी अधिकारी, अर्जुन गुरुङ, रीया श्रेष्ठ, रामकेशर बोगटी, मेलिना मानन्धर लगायतका कलाकारको अभिनय छ । चलत्रिमा राज कटुवाल र निर्जन थापा नयाँ प्रस्तुतीको रुपमा देखिदैछन् । १ करोड माथिको बजेटमा तयार भएको भनेर दाबी गरिएको यो चलचित्रले एक्सन, कमेडी, रोमान्स, सामाजिक र क्राइमको बिषयलाई उठान गरेको छ ।