क्षेत्रीको स्वर फर्काउन ‘राज्जा रानी’ ले थाल्यो पैसा जुटाउन

दर्जनौं नेपाली चलचित्रमा जीवन्त अभिनय गरिसकेका कलाकार दीपक क्षेत्री अहिले बोल्न सक्दैनन् तर उनले आफ्नो बोली गुमाएपनि चलचित्र अभिनयबाट भने टाढा बसेका छैनन् । स्वर नलीमा मासु पलाएका कारण स्वर गुमाएका दीपकको स्वर फिर्ता गर्न हाल छायाँकनरत चलचित्र ‘राज्जा रानी’ ले आर्थिक सहयोग संकलन अभियान सुरु गरेको छ । यो चलचित्रमा दीपक क्षेत्रीको महत्वपूर्ण भूमिका रहेको छ । बिहिबार साँझ दीपक क्षेत्रीको जन्मदिन मनाउने क्रममा चलचित्र ‘राज्जा रानी’ निर्माता एमके पौडेलले १ लाख ११ हजार १ सय ११ रुपैयाँ बैंक खाता खोल्ने घोषणासँगै क्षेत्रीको स्वास्थ्य उपचारार्थ आर्थिक संकलन अभियान सुरु भएको हो ।
यस्तै, ‘राज्जा रानी’ की अभिनेत्री केकी अधिकारी र नायक नाजिर हुसेनले क्षेत्रीको जन्मदिनको पार्टीमा क्रमश: २५/२५ हजार रुपैयाँ सहयोगको घोषणा गरे भने ‘राज्जा रानी’ का निर्देशक यम थापा र छायांकार पुरुषोत्तम प्रधानले १०/१० हजार, मेकअपम्यान सरल बुढाथोकी र भान्छा सम्हाल्दै आएका हरि थापाले ५र५ हजार दिने घोषणा गरेका छन्। क्षेत्रीको उपचारका लागि राज्जा रानी टिमबाटै अहिलेसम्म २ लाख २१ हजार संकलन निधो भएको छ। आफ्नो घाँटीको शल्यक्रियाका लागि झण्डै ५ लाख खर्च लाग्ने कलाकार क्षेत्रीले बताए । उनी आफ्नो करियरमै पहिलो पटक छायांकन सेटमा जन्मदिन मनाउँदा निकै खुसी देखिन्थे ।
उनको महत्वपूर्ण भूमिका रहेको चलचित्र ‘सेतो सूर्य’ हालसालै प्रदर्शनमा आएको थियो भने चलचित्र ‘झोला’ मा उनले नायिका गरिमा पन्तका श्रीमानको भूमिका प्ले गरेका थिए । अहिले यो चलचित्रको नेपालगंजको रनियापुर, बानियाँगाउँ, नेपालगंजबजार, जमुनियालगायतका स्थानमा छायाँकन भैरहेको छ ।