‘सुब्बा साब’ लिएर दशैंमा हल छिर्दै जीवन

जीवन लुइँटेल, सरोज खनाल, गौरी मल्ल, वर्षा शिवाकोटी, जानवी बस्नेत लगायतका कलाकारहरुले अभिनय गरेको चलचित्र ‘सुब्बा साब’ दशैंको फुलपातीको अघिल्लो दिन अर्थात असोज २१ गतेबाट देशव्यापी प्रदर्शनमा आउँदैछ । केही दिन अगाडी सार्वजनिक चलचित्रको ट्रेलर र एक गीतले चलचित्रप्रति दर्शकहरुको उत्सुकता बढ्दै गरेको अबस्थामा निर्माणपक्षले प्रचार प्रसारलाई पनि आक्रामक बनाउँदै आएको छ । छविराज ओझाले निर्माण गरेको चलचित्र ‘किस्मत २’ सँग एकसाथ प्रदर्शनमा आउने भएका कारणले पनि चलचित्र ‘सुब्बा साब’ ले आफ्नो प्रचारलाई अहिले कमी हुन दिएको छैन । आशुतोष फिल्मस् प्रोडक्सन प्रालि र शुभ सक्षम म्युजिक प्रालिको व्यानरमा निर्माण भएको यो चलचित्रमा राजु अधिकारीको निर्देशन छ । निर्देशक अधिकारीले चलचित्रले निजामती कर्मचारी सुब्बाको इमान्दारिता र राष्ट्र सेवा अनि सन्तान प्रतिको माया र दायित्वलाई प्रस्तुत गरेको बताए । हिरामणि न्यौपानेको प्रस्तुतिमा तयार भएको चलचित्रमा रामबहादुर कोइरी, कुलचन्द्र पाण्डे, जीवन अर्याल र रामु अधिकारीको लगानी छ । चलचित्रमा हिरामणि न्यौपानेको कथा र संगीत, शर्मिला न्यौपानेको गीत, कमल राई र गोविन्द्र प्रभातको नृत्य, सञ्जय तुम्रुक, डेबिट, अञ्जु पन्त, मिलन अमात्य र संयोग योगीको स्वर, सुवास देवकोटाको सम्पादन, मौनता श्रेष्ठको पटकथा तथा संवाद र पवन गौतमको छायांकन छ ।