प्रियंका चोपडाकी आमाले भनिन्, ‘हामी नेपाली फिल्म बनाउँदैछौं’

केही महिना अगाडी एउटा खबर निकै भाइरल भएको थियो कि बलीउड चलचित्र ‘भुतनाथ’ निर्देशक विवेक शर्माले नेपाली चलचित्र ‘मेरो पैसा खोई ?’ निर्देशन गर्दैछन् । धेरैले यो कुरालाई पत्याएनन् तर विवेक शर्मा नेपाली निर्माता रोज राणासँग मिलेर चलचित्र ‘मेरो पैसा खोई ?’ निर्देशन गर्ने अन्तिम तयारीमा छन् । यो चलचित्रका लागि कलाकार समेत फाइनल भइसकेका छन् । यसबाट पनि के थाहा हुन्छ भने विस्तारै बलीउड चलचित्रकर्मीहरुको नजरमा पनि नेपाली चलचित्रले स्थान पाउन थालेका छन् ।
त्यस्तै, नेपाली कलाकार सुनिल थापाले बलीउड अभिनेत्री प्रियंका चोपडासँग चलचित्र ‘मेरी कोम’ मा काम गरेपछि त झन बलीउडका धेरै कलाकारहरुको ध्यान नेपाली चलचित्रतर्फ पनि बढ्दै गएको देख्न सकिन्छ । बलीउड अभिनेता शत्रुधन सिन्हादेखी आमिर खानले सम्म राम्रो कथा भेटे नेपाली चलचित्रमा काम गर्ने इच्छा राखिसकेको अबस्थामा बलीउड अभिनेत्री प्रियंका चोपडाले नेपाली चलचित्र निर्माण नै गर्ने भएकी छिन् । केही दिनदेखी भारतीय मिडियामा भाइरल भएको समाचारलाई आधार मान्ने हो भने प्रियंकाले आफ्नै होम प्रोडक्शन पर्पल पेबलबाट नेपाली चलचित्र निर्माण लागेकी हुन । चलचित्रको नाम ‘पौवा’ राखिएको छ, जसको नेपाली अर्थ हुन्छ ‘पाहुना’ । हुनत, यसअघि पनि प्रियंकाले आफ्नो होम प्रोडक्शनबाट मराठी चलचित्र ‘भेन्टिलेटर’, भोजपूरी चलचित्र ‘बम बम बोल हा है’ निर्माण गरिसकेकी छिन् । त्यस्तै उनले पंजाबी चलचित्र ‘श्रावण’ निर्माण गरिसकेकी छिन् । जुन रिलिजको तयारीमा छ । भारतको चर्चित पत्रिका टाइम्स अफ इण्डियामा प्रकाशित समाचारका अनुसार प्रियंकाकी आमा मधु चोपडाले सिक्किम बेस्ड नेपाली चलचित्र बनाउन लागेको बताएकी छिन् । चलचित्रमा नेपाल र सिक्किमका स्थानिय कलाकारहरुको अभिनय रहनेछ ।
मधु चोपडाले एक अन्तर्वार्ताको क्रममा भनेकी छिन्, ‘यो एक सिक्किम बेस्ड नेपाली चलचित्र हो । जुन चलचित्रको नाम हामीले पौवा राखेका छौ जसको अर्थ हुन्छ पाहुना । यो चलचित्रको कथाले राजनीतिक अस्थीरताको कारण कसरी आफ्ना बाबुआमाबाट छोरा छोरी छुटिन्छन् भन्ने देखाउन खोज्नेछ ।’
भारतीय भिडियाहरुमा अहिले यो खबर निकै भाइरल बनिरहेको छ । अब यसमा सत्यता चाहिँ कति छ त्यो भने समयले नै देखाउँला ।