सायद यो नेपालमा पहिलो पटक हुँदैछ, कुनै प्रेमजोडीको वास्तविक कथामाथी चलचित्र निर्माण । निर्देशक मिलन चाम्सले नर्वेमा बस्दै आएका एक जोडीको वास्तविक प्रेमकथालाई पर्दामा उतार्ने प्रयास गरेका छन् । ‘बोवी’ नाम राखिएको चलचित्रको सोमबार राजधानीमा निर्माण घोषणा गरियो । नर्वेमा बस्दै आएका इन्जिनियर उमेश थापा र उनकी धर्मपत्नी कविता गुरुङको वास्तविक कथामा निर्माण हुने ‘बोवी’ मा यही जोडीको मुख्य भूमिका रहनेछ । ‘वास्तविक कथा नै उमेश र कविताको भएका कारण हामीले ‘बोवी’ मा रियल जोडीलाई नै पर्दामा देखाउन लागेका हौं’, निर्देशक चाम्सले भने, ‘उमेश र कविताको वास्तविक कथा सुन्दा म नै धेरै पटक रोएको छु ।’
उनले अगाडी थपे, ‘मैले यूरोपमा कविताको वास्तविक कथा सुनें । निकै मन पर्यो, अनि मैले सोचें कि यही कथामाथी चलचित्र बनाउँछु । त्यसपछि मैले चलचित्रमा कसलाई लिड रोलमा खेलाउने भनेर सोच्दा विभिन्न नायक नायिकाहरुको तश्वीर आँखा अगाडी आयो तर उमेश र कविताको रियल स्टोरी भएका कारण किन उनीहरुलाई मुख्य भूमिकामा नखेलाउने भन्ने सोचें र मैले कवितालाई यस विषयमा भने । तर, कविताले आफ्नो रियल स्टोरीमा आफै खेल्न भने मानिन् तर बल्ल-बल्ल मनाएँ ।’
प्राप्त खबरका अनुसार, चलचित्रमा उमेश र कवितासँगै पाइलट विजय लामाको पनि मुख्य भूमिका रहनेछ । चलचित्रले धनाड्य परिवारकी छोरी कविता एक्कै चोटी गरिव परिवारका उमेशसँग विवाह हुँदा आउने विभिन्न समस्याहरुलाई उठाउनेछ । जुनबाट चलचित्रको छायांकन सुरु हुनेछ ।
चलचित्रको विषयमा बोल्दै कविताले भनिन्, ‘मलाई लाग्छ हाम्रो प्रेमकथा अरुको भन्दा सायद केही फरक छ । जुन चलचित्र बोवी बनेपछि सबैले हेर्न पाइहाल्नुहुन्छ । मलाई लाग्छ हाम्रो रियल स्टोरी जस्तो थियो त्यस्तै पर्दामा पनि दर्शकहरुले देख्न पाउनुहुनेछ ।’
त्यस्तै, कविताका श्रीमान तथा चलचित्रका नायक उमेशले भने -‘कविता र मेरो प्रेमकथा निकै अनौठो पनि छ र निकै यूनिक पनि छ । सायद पर्दामा ‘बोवी’ आएपछि दर्शकहरुले पनि मन पराउनुहुन्छ ।’
चलचित्रको स्क्रिप्ट अहिले सञ्चारकर्मी नरेश भट्टराइले लेखिरहेका छन् । चलचित्रमा ताराप्रकाश लिम्बुको संगीत, नवराजकृष्णको छायांकन, अर्जुन जीसीको सम्पादन रहने छ । १२ दिन नर्वेमा छायांकन हुने यो चलचित्रको पोखरा, काठमाडौं लगायतका स्थानहरुमा पनि हुनेछ ।
तपाईहरुलाई बताइदिउँ कि उमेशले कवितालाई रियल लाइफमै ‘बोवी’ भनेर बनाउने भएकाले चलचित्रको नाम नै बोवी राखिएको हो ।
त्यस्तै, चलचित्र ‘बोवी’ लाई शुभकामना दिँदै चलचित्र पत्रकार संघका, नेपालका अध्यक्ष सन्दिप सापकोटाले निर्देशक मिलन चाम्स मौलिक कथावस्तुमा चलचित्र निर्माण र निर्देशन गर्न माहिर भएका कारण ‘बोवी’ पनि उत्कृष्ट चलचित्र बन्ने विश्वास व्यक्त गरे । चलचित्रलाई वितरक तथा नायक गोविन्द शाहीले पनि शुभकामना दिएका थिए ।
तश्वीर : कमल प्रसाई
