‘पशुपतिप्रसाद’ निर्देशकको नयाँ फिल्म ‘लभ लभ लभ’

 गएको बर्ष पशुपतिप्रसाद चलचित्र निर्देशन गरेर चौतर्फी तारिफ बटुलेका निर्देशक दिपेन्द्र के. खनालले पहिलो पटक पूर्णतया प्रेमकथामा आधारित भएर चलचित्र ‘लभ लभ लभ’ निर्देशन गर्ने भएका छन् । आइतबार राजधानीमा एक कार्यक्रमका बिच निर्देशक दिपेन्द्र के. खनालले चलचित्रको पोष्टर र कलाकारहरुको परिचय गराएका थिए । चलचित्रको मुख्य कलाकारमा स्वस्तिका खड्का (बस्नेत) र सुरज पाण्डेको मुख्य भुमिका रहनेछ । स्वस्तिका र सुरजको साथै चलचित्रमा देशभक्त खनाल, रमेश बुढाथोकी, रुपा राना लगायतका कलाकारहरुको पनि अभिनय रहनेछ । चलचित्र निर्माण घोषणा कार्यक्रममा बोल्दै निर्देशक खनालले भने -‘मलाई पूर्णतया प्रेमकथामा आधारित भएर एउटा चलचित्र निर्देशन गर्न मन थियो, जुन आज पुरा हुँदैछ । चलचित्रमा हाम्रो सानो कुरामा ठूलो इमोसन खोज्ने प्रयास हुनेछ ।’ उनका अनुसार चलचित्रमा आफ्नो रियल लाइफमा भएको प्रेमकथाको केही अंश पनि रहनेछ । अमृत पोण्ड र शर्मिला पाण्डेको लगानीमा तयार हुने यो चलचित्रको सम्पुर्ण छायाँकन पोखरामा हुनेछ । निर्माणपक्षका अनुसार चलचित्रको छायाँकन भदौ ९ गतेबाट सुरु हुनेछ ।