मलाई नाच्न आउँदैन र सक्दिन पनि : दयाहाङ राई

नायक दयाहाङ राई यूवापुस्ताका चर्चित नायक हुन् । नेपालको भोजपुर खावा भन्ने ठाउँमा जन्मिएका नायक दयाहाङ राईलाई नचिन्ने अहिले सायदै होलान र उनको अभिनयको तारिफ नगर्ने पनि । रंगमन्च हुँदै चलचित्रको पर्दामा उदाएका दयाहाङ राई अहिलेका सफल र व्यस्त नायक हुन् । २००६ बाट नेपाली चलचित्रमा अभिनय यात्राको थालनी गरेका दयाहाङ राईले अहिलेको अवधीसम्म दुई दर्जन बढी चलचित्रमा काम गरिसकेका छन् भने उनका एकाध चलचित्र बाहेक धेरै चलचित्रहरु सफल छन् । तर उनका फ्यानहरुको एउटै गुनासो रहिरहेको छ त्यो हो दयाहाङ राईलाई नाच्न आउँदैन । यो कुरा दयाहाङ राई स्वयम स्वीकार गर्छन । उनी आफुलाई नाच्न नआउने बताउँछन् । उनी भन्छन्, ‘मलाई नाच्न आउँदैन किनकी नाच्नका लागी जुन रिदम चाहिन्छ त्यो मसँग छैन ।’
उनले अगाडी थपे -‘मलाई नाच भनेपछि निकै गाह्रो लाग्छ । मेरो रिदम कमजोर छ । मैले नाच्नका लागी धेरै कोशिश गरेको पनि थिए तर असफल भएको छु ।’
उनले नायिका प्रियंका कार्की र आफ्नो जोडीलाई दर्शकहरुले मन पराएकै कारण बारम्बार एकसाथ काम गर्दै आएको पनि बताए । उनले भने -‘मलाई प्रियंका कार्कीसँग काम गर्न सजिलो हुन्छ । किनकी हामी सानो-सानो कुरामा डिस्कसन गरेर बस्दैनौं त्यसैले पनि प्रियंकासँग काम गर्न निकै सजिलो लाग्छ ।’
नायिका प्रियंका कार्कीसँग लगातार चलचित्रमा काम गर्दे गर्दा केही दिन अगाडी मात्र दयाहाङ राईले नायिका केकी अधिकारीसँग चलचित्र ‘घामपानी’ मा काम गरेका थिए । उनले नायिका केकी अधिकारीसँग काम गर्न पनि निकै रमाइलो भएको बताएका छन् । नायक दयाहाङ राई र प्रियंका कार्की अभिनित चलचित्र ‘पुरानो डुङ्गा’ मंसीर १० गतेबाट रिलिज हुँदैछ ।