हमालको सरकारलाई प्रश्न, ‘के सबै स्तन क्यान्सर पीडितलाई ५० लाख दिन लागेको हो ?’

सरकारले कांग्रेस नेतृ सुजाता कोइरालाको उपचारका लागि ५० लाख दिने निर्णय गरेको विषयलाई लिएर सामाजिक सञ्जालमा सरकारको तीव्र आलोचना भइरहेको छ । पूर्वमन्त्रीसमेत रहेकी नेतृलाई सरकारले उपचार खर्च दिने निर्णय गर्दा सामाजिक सञ्जालमा सरकारसँगै सुजाताको पनि चर्को रुपमा विरोध भइरहेको छ । सामाजिक सञ्जालमा धेरैले सरकारको निर्णयप्रति आलोचना गर्दै गर्दा क्रमश नेपाली चलचित्रकर्मीहरुले पनि आफ्नो विचार राख्दै गएका छन् । त्यही क्रममा पछिल्लो समय सामाजिक सञ्जालामा निकै सक्रिय नायक राजेश हमालले पनि सुजातालाई ५० लाख रुपैयाँ दिने सरकारी निर्णयप्रति व्यंग्य गरेका छन् ।
आफ्नो फेसबुकमा राजेशले लेखेका छन्, ‘के यो मैले साचो सुन्दै छु ? वर्तमान सरकारले प्रत्येक स्तन क्यान्सर पीडितहरुलाई ५० लाख दिन लागेको हो ? कि मैले गलत सुने ? कृपया मलाई सच्चाइदिनुहोला ।’
उनले सुजता कोइरालाको नाम उल्लेख नगरि फेसबुकमा कूटनीतिक रूपमा सरकारले गरेको निर्णय प्रति चोटिलो प्रहार गरेका छन् । मलेसिया भ्रमणमा गएका बेला विरामी परेर जाँच गराउँदा कोइरालामा स्तन क्यान्सरको लक्षण देखिएको थियो ।