‘दंगल गर्ल’ को मजाक उडाएपछि आमिरले भने, ‘उसलाई एक्लै छोडिदिनुहोस’

आमिर खान अभिनित चलचित्र ‘दंगल’ मा गीता फोगाटको रोलमा अभिनय गरेर वाहवाही कमाएकी कश्मीरकी अभिनेत्री जायरा वसिमलाई सामाजिक सञ्जालमा धेरैले आलोचना गरेपछि आमिर खानले जबाफ दिएका छन् ।
जायराले शनिबार जम्मू कश्मीरकी मुख्यमन्त्री महबुबा मुफ्तीसँग भेटघाट गरेकी थिइन् । यसै प्रकरणलाई लिएर धेरैले फेसबुक लगाएतका सामाजिक सञ्जालमा मजाक उडाएपछि जायराले सोमबार फेसबुकमा माफि समेत मागेकी थिइन् ।
जाबेद अख्तर, उमर अब्दुल्ला, गीता फोगाट, अशोक पंडित, अनुराग कश्यप, आमिर खान लगाएतले उनको समर्थन गरेपछि अन्य बलिउड कलाकारहरुले पनि उनको समर्थन गर्न थालेका छन् ।
आमिर खानले जायरालाई खुलेर समर्थन गरेक छन् । उनले ट्विटरमा लेखेका छन्, ‘मैले जायराको विज्ञप्ती पढें र म यो बुझ्न सक्छु कि उनलाई किन यो विज्ञप्ती लेख्न पर्यो । जायरा म तिमीलाई भन्न चाहान्छु कि हामी सबै तिम्रो साथमा छौं ।’
‘तिम्रो सुन्दरता, मेहनत, हिम्मत, साहस, मेहनत र प्रतिभाले तिमीलाई भारतको मात्रै होइन पुरै विश्वका बच्चाहरुको रोल मोडल बनाएको छ । भगवानले तिमीलाई धेरै आशिवार्द दिउन, तिमीलाई मेरो माया छ ।’
आमिरले यो पनि लेखेका छन्, ‘म सबैसँग अपिल गर्न चाहन्छु कि उसलाई एक्लै छोडिदिनुहोस । उनको सम्मान गर्नुहोस किनभने उनी मात्रै १६ वर्षकी बच्ची हुन् तर उनी आफ्नो उत्कृष्ट क्षमता देखाएर जिन्दगीसँग लड्ने कोसिस गरिरहेकी छिन् ।’