एक फिल्मबाट नीतालाई चाहियो १० लाख, भन्छिन्, ‘पेट पाल्न म्यूजिक भिडियो गर्छु’

चलचित्रमा अभिनय गरेपछि पव्लिसिटीमा नहिँड्ने नायिका भनेर चर्को आलोचना खेप्दै आइरहेकी नीता ढुंगानाको यही चैत ११ गते चलचित्र ‘निर्भय’ हलमा लाग्दैछ । पहिलो पटक एक्सन नायक निखिल उप्रेतीसँग स्क्रिन शेयर गरेकी नीताले ‘निर्भय’ मा टिचरको क्यारेक्टर र एक निडर श्रीमतीको भूमिका निर्वाह गरेको बताइन् । शनिबार पत्रकारहरुसँग कुरा गर्दै उनले चलचित्र ‘निर्भय’ सशक्त कथावस्तुमा तयार भएको बताउँदै निखिलसँग आफ्नो केमेष्ट्री सुहाएको पनि बताउन भ्याइन् ।
उनले भनिन्, ‘निर्भयमा म हिरोको वरीपरि मात्र नाँच्ने होइन एउटा मेजर क्यारेक्टर नै निर्वाह गर्ने मौका पाएकी छु ।’ पछिल्लो समय नीताका धेरै चलचित्रहरु असफल हुँदै आएका छन् । उनलाई अहिले एउटै आरोप लाग्ने गरेको छ, ‘नीता चलचित्रको कथावस्तु नै छान्न सक्दिनन् ।’ तर, नीता यस विषयमा भन्छिन्, ‘म चलचित्रलाई एउटा लक र गेमको हिसाबले हेर्छु । कहिले नराम्रो चलचित्रहरु पनि राम्रो चलिरहेका हुन्छन् भने कहिले राम्रो चलचित्रहरु पनि चलिरहेका हुन्नन् । मेरा यसअघिका चलचित्रहरु नचल्दा नरमाइलो त पक्कै लागेको छ । तर चलचित्र हिट वा फल्प हुने एउटा हिरोईनको हातमा हुँदैन र एउटा हिरोईनलाई चलचित्र फल्प हुँदा घाटा नै हुन्छ भन्ने चाहिँ मलाई लाग्दैन ।’
नीताको व्यस्तता पछिल्लो समय चलचित्र भन्दा पनि बढी म्यूजिक भिडियोतर्फ देखिन्छ । उनी म्यूजिक भिडियो खेल्नुलाई वाध्यता मान्छिन् । उनी भन्छिन्, ‘म सम्पन्न परिवारकी छोरी भएको भए म्यूजिक भिडियो खेल्न मलाई आवश्यक पर्दैन थियो होला । तर आफ्नो पेट पाल्नका लागि म्यूजिक भिडियो खेल्नु पर्ने मलाई वाध्यता छ । नायिका भनेर मात्र जीवन जिउन सकिन्न रहेछ ।’ उनले एउटा चलचित्रबाट १० लाख पारिश्रमिक पाए बर्षमा अरु कुनै चलचित्र नगर्ने पनि नीताले पत्रकारमाझ बताइन् ।
त्यस्तै, निर्देशक मधुशुदन भट्टराईले चलचित्र ‘निर्भय’ को कथावस्तु वास्तविक घट्नामा आधारित रहेको बताए । यो चलचित्रलाई देवी प्रसाद पाण्डेले निर्माण गरेका हुन । चलचित्र ‘निर्भय’ मा नायक निखिल उप्रेतीले खतरनाक रियल स्टन्डका दृश्यहरु दिएका छन् । चलचित्रमा निखिल र नीताका अलवा शुशिल पोखरेल, विकास चापागाई, विशाल पहाडी, कृष्ण शिवाकोटी, प्रदिप ढकाल, प्रज्ज्वल गिरी, रश्मि भट्ट लगायतको अभिनय रहेको छ ।