केही बर्षदेखी घाँटीमा मासु पलाएर आफ्नो स्वर गुमाउँदै गएका कलाकार दीपक क्षेत्रीको उपचार बिहिवारबाट सुरु हुने भएको छ । बरिष्ठ नाक, कान तथा घाँटी रोग बिशेषज्ञ डा. बिके सिन्हाको रहोवरमा क्षेत्रीको उपचार सुरु हुन लागेको हो । हाल क्षेत्रीको उपचारका लागि सहयोग संकलन गरिरहेको चलचित्र पत्रकार संघ, नेपालका अध्यक्ष सन्दिप सापकोटाका अनुसार, प्रारम्भिक चरणबाट नै काठमाण्डौको ग्राण्डी इन्टरनेशनल अस्पतालमा बिहिवारदेखी उपचार शुरु हुनेछ । बुधवार चलचित्र पत्रकार संघ, नेपालका अध्यक्ष सन्दिप सापकोटा, सहकोषाध्यक्ष जिवन पराजुली र कलाकार तथा निर्देशक निर्मल शर्माले स्वास्थ्य अवस्था बुझ्न दीपक क्षेत्रीको नीजि निवासमा पुगेर बिहिवारबाट उपचार शुरु हुने जानकारी गराएका छन् ।चलचित्र पत्रकार संघ, नेपालले दीपक क्षेत्रीको स्वर फर्काउन सहयोग रकम संकलन अभियान नै सञ्चालन गरेपछि यतिबेला विश्वभरबाट चलचित्रकर्मीदेखी प्रशंसकहरुले आर्थीक सहयोग गरिरहेका छन् । करिब ७ लाखको आसपासमा खर्च लाग्ने क्षेत्रीको उपचारका लागि चलचित्र पत्रकार संघ, नेपालले मात्र ३ लाख बढी संकलन गरिसकेको छ । यस विषयमा संघका अध्यक्ष सन्दिप सापकोटाले भने, ‘अहिले कलाकार क्षेत्रीको स्वास्थ्य उपचारका लागि देशदेखी विदेशबाट सहयोग प्राप्त भैरहेको छ । बुधवारसम्ममा संघले क्षेत्रीको उपचारका लागि ३ लाख रुपैयाँ संकलन गरिसकेको छ भने अझै व्यापक रुपमा सहयोग प्राप्त भैरहेको छ ।’
कलाकार क्षेत्रीले घाँटीमा मासु पलाएका कारण स्वर गुमाउँदै गएपनि उनले अभिनयलाई भने ब्रेक गरेका छैनन् । उनले केही दिन अगाडी मात्र चलचित्र ‘राज्जा रानी’ को छायांकन सकाएर काठमाडौं फर्किएका थिए ।