मुम्बई(एजेन्सी) । फिल्म ‘जाने तू या जाने ना’ बाट बलिउडमा डेब्यू गरेका अभिनेता इमरान खान अहिले फिल्मबाट टाढा छन् । अभिनेता आमिर खानका भाञ्जा रहेका इमरान सामाजिक सञ्जालमा पनि उति सक्रिय छैनन् । अहिले यिनै इमरान लामो समयपछि फिल्ममा पुनरागमन गर्दैछन् ।
इमरानको फिल्मी पुनरागमन अभिनेताका रुपमा नभई निर्देशकका रुपमा हुँदैछ । इमरान अभिनित पछिल्लो फिल्म ‘कट्टी बट्टी’ सन् २०१५ मा रिलिज भएको थियो । यो फिल्मले बक्सअफिसमा खासै कमाल देखाउन सकेन । फिल्म असफल भएपछि उनी पनि अभिनय करियरबाट टाढिएका थिए । फिल्मबाट टाढिएपछि उनले प्रेमिका अवन्तिकासँग विवाह गरे । तर दुर्भाग्य अहिले अवन्तिकासँगको सम्बन्धविच्छेदका कारण इमरान चर्चामा छन् ।
इमरान निकटका अनुसार उनी अब निर्देशनमार्फत फिल्ममा फर्कने तयारीका लागि धमाधम स्क्रिप्टको काम गरिरहेका छन् । उनी सन् २०२३ बाट सुटिङ शुरु गर्ने योजनामा छन् ।
‘इमरान लामो समयदेखि निर्देशनमा आउन चाहन्थे । उनलाई अब अभिनय भन्दा पनि निर्देशनमा आउने चाहना छ । त्यही चाहना पुरा गर्न उनी जोडतोडका साथ काम गरिरहेका छन्’, उनी निकट स्रोतले भन्यो । उनी आफूले निर्देशन गर्ने फिल्ममा अभिनय गर्छन् या गर्दैनन् भन्ने चासो आम दर्शकमा छ ।