‘लालपूर्जा’ पन्छिएपछि भित्रिए दुई फिल्म, नयाँ बर्षमा हुनेछ पाँच फिल्मको भिडन्त

प्रत्येक नयाँ बर्षमा नेपाली चलचित्रको भिडन्त हेर्न लायककै हुने गर्छ किनकी नयाँ बर्षलाई लक्षित गरेर निर्माताहरुले आफ्नो चलचित्रको प्रदर्शन मिति एकपछि अर्को फाइनल गर्दै जाँदा तीन भन्दा बढी हुने गर्छ । अर्को बर्षको सुरुवातको दिन पनि यसले निरन्तरता पाउने भएको छ । केही दिन अगाडी चलचित्र ‘लालपूर्जा’ ले आफ्नो रिलिज मिति पोष्टपोन्ड गरेको खबर बाहिरिएसँगै सोही मितिमा लड्न अर्का दुई नेपाली चलचित्र तयार भएका छन् । यसअघि ‘राधे’, ‘लभ लभ लभ’ र ‘घामपानी’ ले बैशाख १ गतेलाई रिलिज मिति फाइनल गरेका थिए र यसै मितिमा प्रदर्शन हुने भन्दै चलचित्र लालपूर्जा आएको थियो तर ‘घामपानी’ निर्माता र ‘लालपूर्जा’ निर्माताबीचको समझदारीमा ‘लालपूर्जा’ को प्रदर्शन मिति बैशाख २८ मा पुराइयो । ‘लालपूर्जा’ ले आफ्नो रिलिज मिति पोष्टपोन्ड गरेसँगै सोही मितिमा लड्न अर्का दुई नयाँ नेपाली चलचित्र आएका छन् । ति हुन चलचित्र ‘मेरी कुसुम’ र ‘ह्याप्पी न्यू ईयर’ । निखिल उप्रेती स्टारर चलचित्र ‘राधे’, दयाहाङ राई र केकी अधिकारी अभिनित चलचित्र ‘घामपानी’, स्वस्तिमा खड्का र सुरज पाण्डे अभिनित चलचित्र ‘लभ लभ लभ’, मोहन बोगटी अभिनित चलचित्र ‘मेरी कुसुम’ र सन्ध्या केसी र कौशल थापा अभिनित चलचित्र ‘ह्याप्पी न्यू ईयर’ नयाँ बर्षमा एकसाथ प्रदर्शनमा आउने पक्का भएका छन् ।
नयाँ बर्ष आउन अझै ३ महिना बढी भएका कारण यी पाँच चलचित्रले आफ्नो रिलिज मिति पोष्टपोन्ड गर्छन वा गर्दैनन् त्यो भने हेर्न बाँकी नै छ तर यसो भएन भने बैशाख १ गते पाँच नेपाली चलचित्रको लडाइँ गज्जबकै हुनेछ ।
यसरी एकसाथ पाँच चलचित्र मैदानमा उत्रिदा फाइदा पुग्ने कसैलाई पनि होइन तर निर्माताहरुबीचको ब्यावसायिक द्धन्द्धले गर्दा बैशाख १ गते पाँच चलचित्र एकसाथ प्रदर्शनमा आउने लगभग पक्का भएको छ । यस पटक बैशाख १ गते शुक्रबार भएका कारण पनि सोही मितिमा आफ्नो चलचित्र प्रदर्शन गर्न निर्माताहरु मरिहत्ते गरिरहेका छन् । अब यी पाँच चलचित्रमाथी पनि सौता बनेर अरु चलचित्रले प्रदर्शन मिति तोक्छन् वा तोक्दैनन् त्यता तिर पनि अहिले चलचित्रकर्मीदेखी दर्शकहरुको ध्यान खिचिदै गएको छ ।