‘लादालाम’ को परिवारलाई ‘लाल्टिन’ को आर्थिक सहयोग

चैत १८ गतेलाई रिलिज डेट लक गरिएको चलचित्र ‘लाल्टिन’ को पहिलो च्यारिटी शो बाट उठेको रकमबाट ५० हजार रुपैया स्वर्गीय कलाकार आर.पी. भट्टराई (लादालाम) को परिवारलाई हस्तान्तरण गरिएको छ । नायक निर्जन थापाको नेतृत्वमा भएको चलचित्रको च्यारिटी शो माघ १९ गते काठमाण्डौको जय नेपाल हलमा गरिएको थियो । च्यारिटी शोमा बैङ्कर अनिल शाह, चलचित्र ‘लालटिन’ का निर्माता भानु प्रताप ढकालदेखी कलाकार तथा समाजसेवीहरुको पनि उपस्थिती रहेको थियो । यो चलचित्रमा स्वर्गीय कलाकार आर.पी. भट्टराईको समेत अभिनय रहेको छ ।
रकम हस्तान्तरण कार्यक्रममा बोल्दै निर्माता एवं कलाकार भानु प्रतापले एक कलाकारको सुखदुखमा साथ दिनु पर्छ भन्ने उदेश्यले आर.पी भट्टराईको सम्मानमा रकम सहयोग गरेको बताए ।
यो चलचित्रलाई देव कुमार श्रेष्ठले निर्देशन गरेका हुन् । भानु प्रताप प्रस्तुतकर्ता रहेको यो चलचित्रलाई अनिम श्रेष्ठ र राज केसीले निर्माण गरेका हुन् । मनोज राजभण्डारी र दीपक श्रेष्ठ यसका सह-निर्माता हुन् । चलचित्रमा हरि लामाको छायांकन, अर्जुन जीसी र वनिश शाहको सम्पादन, भानु प्रताप र किरण माइकलको लेखन छ । रोशन श्रेष्ठको एक्सन रहेको चलचित्रमा कविराज गहतराज, दिकेश र भानुप्रतापले कोरियोग्राफी गरेका छन् ।
चलचित्रमा दयाहाङ राई, प्रियंका कार्की, केकी अधिकारी, अर्जुन गुरुङ, रीया श्रेष्ठ, रामकेशर बोगटी, मेलिना मानन्धर लगायतका कलाकारको अभिनय छ । चलत्रिमा राज कटुवाल र निर्जन थापा नयाँ प्रस्तुतीको रुपमा देखिदैछन् । १ करोड माथिको बजेटमा तयार भएको भनेर दाबी गरिएको यो चलचित्रले एक्सन, कमेडी, रोमान्स, सामाजिक र क्राइमको बिषयलाई उठान गरेको छ ।