‘कामना अवार्ड’ मा सौगात र नम्रता उत्कृष्ट नायक-नायिका, प्रियंकालाई ‘पपुलर’ अवार्ड

सीजी इन्टरटेन्मेन्टको प्रस्तुतीमा आयोजना भएको ‘लक्स कामना फिल्म अवार्ड २०७३’ शनिबार राजधानीको आर्मी अफिसर क्लबमा सम्पन्न भएको छ । गतबर्ष भूकम्पका कारण वितरण नगरिएको कामना अवार्ड वि.सं २०७१ सालमा पहिलो पटक आयोजना भएको थियो । प्राविधिक प्रदिप उपाध्याय र निर्देशक लक्ष्मीनाथ शर्मालाई ‘लाइफ टाइम एचिभमेन्ट अवार्ड’ प्रदान गर्दै ‘लक्स कामना फिल्म अवार्ड २०७३’ सुरु भएको थियो । यस बर्षको ‘लक्स कामना फिल्म अवार्ड’ गएको बर्ष प्रदर्शनमा आएको चलचित्र ‘फन्को’ बाट नायक सौगात मल्लले सर्वोत्कृष्ट नायकको अवार्ड र ‘क्लासिक’ बाट नायिका नम्रता श्रेष्ठले सर्वोत्कृष्ट नायिकाको अवार्ड उचाले । यस बर्ष आयोजना भएका अधिकांश अवार्डहरुमा चलचित्र ‘कबड्डी कबड्डी’ बाट दयाहाङ राई र ‘क्लासिक’ बाट नायक आर्यन सिग्देलले अवार्ड थाप्दै आएका थिए तर कामना अवार्डबाट भने नायक सौगात मल्लले यस बर्ष पहिलो पटक सर्वोत्कृष्ट नायकको अवार्ड हात पारेका छन् । अवार्ड उचाल्न नायिका नम्रता कार्यक्रममा उपस्थित भएकी थिइन तर सौगात अनुपस्थित थिए । यस्तै, जुरी अवार्ड भने निर्देशक उज्ज्वल घिमिरे र चलचित्र ‘कबड्डी कबड्डी’ लाई प्रदान गरियो । अन्य विधाहरुमा गायक राजेशपायल राइले क्रिटिक्स (म्यूजिक) अन्र्तगत अवार्ड पाए भने क्रिटिक्स (थिएटर) तर्फको अवार्ड सरिता गिरी र क्रिटिक्स (फेशन) तर्फको अवार्ड प्रशान्त ताम्राकारलाई प्रदान गरिएको थियो । त्यस्तै अवार्ड कार्यक्रममा पपुलर कलाकारको अवार्ड भने नायिका प्रियंका कार्कीले जितेकी छिन् । दर्शकहरुले उनलाई एसएमएसबाट भोटिङ गरेर जिताएका हुन् । प्राविधिक कारणले निकै फितलो देखिएको अवार्ड कार्यक्रममा निकै कम संख्यामा चलचित्रकर्मीहरुको उपस्थिती रहेको थियो । कार्यक्रममा नायिका नम्रता सापकोटा लगायतका कलाकारहरुले आफ्नो नृत्य पनि प्रस्तुत गरेका थिए । ‘कामना अवार्ड’ झण्डै ४ घण्टा चलेको थियो ।