मालाले ‘काले दाइ’ भनेपछि निश्चलले मागे आँसु पुस्ने रुमाल

फागुन १३ गतेबाट देशव्यापी प्रदर्शनमा आउन लागेको चलचित्र ‘लुट २’ मा समाबेश ‘ठमेल बजार’ बोलको आइटम गीतमा निर्देशक निश्चल बस्नेतले मोडल एलिसा राईसँग नृत्य गरेको त हेर्नु भएको नै छ होला । यो गीत हेरेपछि निर्देशक बस्नेत चलचित्र निर्देशनमा मात्र होइन नृत्यमा पनि उतिक्कै अब्बल छन् भन्ने पृष्टि गरेको थियो । ‘ठमेल बजार’ बोलको गीतमा निश्चलको नृत्य हेरेका दर्शकहरुले ‘पर्व’ नामक चलचित्रको एक आइटम गीतमा हट नायिका माला लिम्बुसँग कम्मर मर्काएका छन् । केही दिन अगाडी मात्र सुट गरिएको चलचित्र ‘पर्व’मा समाबेश ‘काले दाइ’ बोलको आइटम गीतलाई निर्माणपक्षले माघे संक्रन्तिलाई लक्षित गर्दै सार्वजनिक गरेको हो । छायांकन भएको एक सातामै चलचित्रको गीत बजारमा आएको खासै देखिदैन । चैत्र २५ गतेबाट यो चलचित्र रिलिज हुँदैछ । यसैले, पनि निर्माणपक्षले गीतलाई प्रचारको मुख्य साधन बनाएर बजारमा ल्याएको हो ।
टीभी फिल्मको निर्माण र सुवास इन्टरटेन्मेन्टको सहकार्यमा यो चलचित्रको निर्माण भएको हो । चलचित्रमा नम्रता श्रेष्ठ, कोशिश क्षेत्री, माला लिम्बु, जेबिका कार्की मुख्य भूमिकामा छन् । सार्वजनिक गीतमा निश्चल बस्नेत र मिना निरौलाको स्वर, दिनेश राउतको शब्द, कोशिश क्षेत्रीको संगीत छ । चलचित्रलाई दिनेश राउतले निर्देशन गरिरहेका छन् । निकिता पौडेल र सुवास गिरीले मिलेर यो चलचित्र बनाएका हुन् । कविराज गहतराजको कोरियोग्राफी रहेको गीतलाई राजेश श्रेष्ठले खिचेका हुन् । सस्पेन्स–थ्रीलर कथामा यो चलचित्र निर्माण गरिने निर्देशक राउतले बताए ।