दुबईमा नेपाली फिल्म रिलिज हुने, ‘वीर विक्रम’ पछि ‘शकुन्तला’ र ‘छक्का पन्जा’

यूएई बलीउड फिल्मको लागि मुख्य बजारको रुपमा मानिन्छ । बलीउड चलचित्रहरु भारतमा रिलिज हुने दिन भन्दा एक दिन अगावै यूएईका विभिन्न हलहरुमा प्रर्दशनमा आउँछन् तर कलिउड नेपाली फिल्म भने ति हलहरुमा प्रदर्शन हुने भन्ने कल्पनामात्र लाग्छ तर अब भने रोजगारीको सिलसिलामा यूएईमा रहेका नेपाली चलचित्रप्रेमीहरुलाई लक्षित गर्दै दुबईका सिनेमा हलमा साप्ताहिक रुपमा नेपाली चलचित्र प्रदर्शन हुने भएको छ । दुबईमा रहेर नेपाली चलचित्रहरु प्रदर्शन गर्दै आइरहेको संस्था कन्सेप्ट भिजन फिल्म प्रोडक्शन एण्ड वितरण कम्पनीले हप्तामा नियमित रुपमा नेपाली चलचित्र प्रदर्शनको लागि अग्रसरता देखाएको हो ।
आइतबार नवौ नेफ्टा अवार्डको घोषणा कार्यक्रममा सहभागी हुन नेपाल आएका कम्पनीका सुवास अनिशसिंह ठकुरी र राजन अधिकारीले दुबईमा ‘वीर विक्रम’, ‘शकुन्तला’ पछि ‘छक्का पन्जा’ चलचित्र प्रदर्शन गर्ने जानकारी दिएका छन् । आइतबार नै अनिशसिंह ठकुरी र राजन अधिकारीले वीर विक्रमका निर्माता एवं निर्देशक मिलन चाम्स र शकुन्तलाका निर्माता महेश्वर खत्रीसँग दुबईमा प्रदर्शन गर्ने सम्झौता पत्रमा हस्ताक्षर गरेका थिए । सम्भवतः सेप्टेम्बर २५ देखी हप्तै पिच्छे नेपाली चलचित्रहरु दुबईमा प्रदर्शन हुनेछन् । नेपाली चलचित्रहरु दुबईमा सात शहरमा प्रदर्शन हुने कम्पनीका प्रमुख सुवास अनिशसिंह ठकुरीले जानकारी दिए । हुनत, यसअघि नै नेपाली चलचित्रहरु दुबईमा साप्ताहिक रुपमा प्रदर्शन हुने बताइएको थियो तर आजसम्म त्यो भएको छैन । तपाईहरुलाई याद रहोस् कि पहिलो पटक दुबईमा छविलाल कन्जुस छैन नामक चलचित्र प्रदर्शनमा आएको थियो ।